Irene Bed en Ontbyt is die ideale plek om by te bly wanneer Pretoria besoek word. Dit is sentraal geleë in Centurion, tussen Johannesburg, Midrand, Kempton Park en Pretoria. Die Jakarandastad het vele besienswaardighede vir die hele gesin. Pretoria se bynaam “Jakarandastad” verwys na die sowat 70 000 jakarandabome wat in en om Pretoria groei en in Oktober met hulle pragtige perskleurige bloeisels ‘n besondere karakter aan die stad gee.

Die Pretoria Nasionale Botaniese Tuine, wat ‘n oppervlak van 76 hektaar beslaan, bied ‘n uitstekende oorsig oor Suid-Afrika se ryk flora in die verskillende klimaatsones van die land, met ‘n omvangryke herbarium en ‘n groot sukkulentetuin. Dit bied ook maklike toegang tot ‘n reeks van interessante voëls in ‘n rustige atmosfeer. Groot grasperke en bome maak deel uit van die laer gedeelte. Daar is ook ‘n teetuin en konferensiefasiliteite, ‘n besoekerssentrum en staproetes.

Al ooit gewonder hoe dit voel om in ’n klassieke, gerestoureerde stoomtrein te ry? Friends of the Rail bied uitstappies op verskeie roetes, insluitend ’n toer om Pretoria.

Laat jou hart ’n bietjie vinniger klop met ’n toer deur Pretoria se spookhuis, ook bekend as die Erasmuskasteel, in Waterkloof. Die naam Spookhuis het in die 1950’s ontstaan toe ’n Afrikaanse spookrolprent Hier’s ons weer op die terrein van die kasteel verfilm is. Dit is ook ’n nasionale gedenkwaardigheid.

Die Nasionale Dieretuin is in 1899 gestig en word as een van die bestes ter wêreld beskou. Dié dieretuin is die enigste in Suid-Afrika met nasionale status en spog met die grootste binnelandse seewatertenk in die land. Vir meer inligting besoekwww.zoo.org.za